ភ្នំពេញ៖ កម្លាំងប៉ុស្តិ៍នគរបាលរដ្ឋបាលវាលវង់ នៃអធិការដ្ឋាននគរបាលខណ្ឌ៧មករា សហការជាមួយកម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ និងកម្លាំងអធិការដ្ឋាននគរបាលខណ្ឌទួលគោក បានចុះស្រាវជ្រាវ និងឃាត់ខ្លួនបានបុរសម្នាក់ ដែលបានប្រព្រឹត្តសកម្មភាពប្រើអំពើហិង្សា យកខ្សែក្រវ៉ាត់ និងកាំបិតបុ័ងតោ វាយ និងកាប់ទៅលើបុរសម្នាក់បណ្តាលឲ្យរងរបួស និងបានកាប់បំផ្លាញម៉ូតូជនរងគ្រោះរងការខូចខាត។

ហេតុការណ៍ខាងលើនេះបានកើតឡើង ខណៈមានការប៉ះពាក្យសំដីគ្នាបង្កជាជម្លោះ នៅទីតាំងកើតហេតុភូមិទី១០ សង្កាត់បឹងសាឡាង ខណ្ឌទួលគោក កាលពីវេលាម៉ោងប្រមាណ ១២និង២០នាទីថ្ងៃត្រង់ ថ្ងៃទី០៣ ខែវិច្ឆិកា ឆ្នាំ២០២៤។ ប្រភពពីស្នងការដ្ឋាននគរបាលរាជធានីភ្នំពេញបានឱ្យដឹងថា ជនសង្ស័យខាងលើមានឈ្មោះ សុខ សេន ភេទប្រុស អាយុ៣១ឆ្នាំ មុខរបរអ្នកដឹកជញ្ជូន ស្នាល់នៅផ្ទះលេខ១០ ជាន់ទី៦ អគារទី២ (បុរីកីឡា) ផ្លូវ២១១ ភូមិ១២ សង្កាត់វាលវង់  ខណ្ឌ៧មករា ត្រូវបានកម្លាំងសមត្ថកិច្ចបង្ក្រាប និងឃាត់ខ្លួនបាននៅវេលាម៉ោង ១២និង៣០នាទីថ្ងៃត្រង់ ថ្ងៃទី០៤ ខែវិច្ឆិកា ឆ្នាំ២០២៤។

បច្ចុប្បន្ន ជនសង្ស័យត្រូវបានកម្លាំងនាយកដ្ឋាននគរបាលព្រហ្មទណ្ ឌនៃអគ្គស្នងការដ្ឋាននគរបាលជាតិ នាំយកទៅសាកសួរ និងកសាងសំណុំរឿងចាត់ការតាមនីតិវិធី៕